ليش صعب نتعامل مع المواطن ؟؟

السلام عليكم ورحمة الله وبركاته
موضوعي اليوم عن التعامل مع المواطن ..

اللي يشوف وضع الدولة اليوم يفتخر بسرعة الانجاز في كافة الجوانب وعلى مستوي الدول . الإمارات احتلت مكانه راقية جداً .. والحلو في دولتنا انه اهتمت بالشباب ودعمت مشاريعهم . عقب ما كانت اغلب المشاريع يدرونها وافدين وأجانب .

الحين في هالوقت تشوف شبابنا برزوا في المشاريع وكل واحد قام يسويله مشروع روحه وعلى قدة ، يحقق له مردود مادي وفي نفس الوقت له أثر ايجابي على نفسية الشخص .

وفي شباب برزوا في الساحات العلمية وأصبحوا دكاترة ومحاضرين وغيرهم .

وشباب أبدعوا في التصميم والتصوير ومجالات لا تعد ولا تحصى .

المهم خلوني ادخل على طول في صلب الموضوع ..

ليش نحن نستحي نتعامل مع المواطن صاحب المشروع أو المحل ..ونفضل يكون هندي أو عربي أو جنسية ثانية وما يكون مواطن ..
ليش ما نشجعه ونوقف وياه ونتعاون وياه بحيث هو يستفيد ونحن نستفيد ..
ليش إذا شفناه موطن شردنا ونسير ندور محل فيه عامل أسيوي أو غيره ..
هل ألانه نحن مأخذين انطباع سيء عن المواطنين وانه أي حرمة تتعامل وياه يمكن يفهمها غلط ..

خلوني اذكر لكم بعض المواقف اللي تعرضت لها أنا شخصياً وبعض من ربيعاتي .

- اذكر درسنا مساق وتفأجانا بدكتور مواطن وقمنا حتى الأسئلة ما نسأله إياها لأنه خفنا يفهمنا غلط وخصوصاً عقب ما صرح بجملته في أول محاضرة "" أنا متزوج وأحب زوجتي وزوجتي تحبني "" >>> أصلا محد ناوي يحبك .

- اتصلت اربيعتي في مقاول تفاجات انه مواطن وقالها لازم نشوف البيت قبل نعطيج رأينا البنت افتكرت انه بيطرش لها حد من العمال اللي عنده .. انصدمت يوم يي روحه للبيت .. ومن المستحي رفضت تتعامل وياه.

- موقف تعرضت له أنا شخصياً اتصلت في رسام وما شاء الله الأخ مواطن وعنده عمال بس وأنا اتصل توقعت يعطيني أي حد من العمال أتفاهم وياه لكن تفاجات انه هو اللي يكلمني ويشرح لي . بس كان فيه خوف وتوتر . وما كان فيه أريحيه مثل التعامل مع الأسيوي او غيره .

ليش نخاف نتعامل مع المواطن ؟؟
ليش ما نتعامل وياه بكل جرأة ؟؟
ليش ما ناقشة ونتفق وياه عادي حاله حال أي صاحب محل أو تجارة ؟؟

يمكن لأنه نخاف يفهمنا غلط . يمكن ألانه نظرة المواطن تختلف عن الأسيوي أو الأجنبي .ونظراته غير
ولا تقولون لا... صح إنا ما أعمم لكن شفت بعيني هذا الموقف

- مرة كنت في القرية العالمية وقفين بنأخذ كرك ( بندول الرأس لازم صبح وعصر ) أشوف المواطن صاحب المحل واقف وفاج حلجة في البنت اللي تطلب ويشوفها بنظرات رغم انه تكلم الهندي ما تكلمه هو . وأنا واقفه شوي بعيد وارقب المنظر.

ليش محطين في بالنا قناعة انه المواطن له غرض في البنت ويمكن يفهم اتصالها أو استفسارها بشكل خاطئ ..يمكن بس جرأة البنات في هالزمن ووقاحتهن الزايدة .
أو نحن كشعب ما عندنا ثقافة في طرق التعامل بين الجنسين .

الموضوع متروك للنقاش وقابل للتحاور ..

في انتظاركم ..